Рэсурс пра асоб з абмежаванымі магчымасцямі

Жыць разам з хворым – гэта сапраўдная школа жыцця

Glauredactar — Sun, 12 Feb 2012 22:32:00 +0000

Арцыбіскуп Зыгмунт Зімоўскі, старшыня Папскай рады пастырства работнікаў сферы аховы здароўя, у сваіх разважаннях з нагоды Сусветнага дня хворага, які католікі адзначаюць 11 лютага, нагадаў пасланне Бэнедыкта ХVI на гэты дзень, у якім папа падкрэслівае фундаментальную ролю веры і сакраментаў у аздараўленні церпячых і хворых. Іерарх адзначыў, што з самага пачатку хрысціянскай эры ў апостальскім жыцці Каталіцкае Царквы вялікае значэнне мела апека над хворымі асобамі. Ён нагадаў, што менавіта “па ініцыятыве Касцёла былі заснаваны першыя шпіталі”, а сёння ў свеце налічваецца больш за 120 тысяч каталіцкіх медыцынскіх устаноў.
Кіраўнік ватыканскай дыкастэрыі падкрэсліў, што ў наш час пастырства ў сферы аховы здароўя надае вялікую ўвагу праблемам медыцынскай этыкі, якасці жыцця, арганізацыі санітарнай службы. “Бо Касцёл верыць у святасць кожнай чалавечай істоты, якая не з’яўляецца нумарам ці нейкім аб’ектам, але асобай, да якой трэба падыходзіць па-чалавечы”, – сказаў арцыбіскуп Зімоўскі. Іерарх звярнуў увагу таксама на адукацыю асоб, які пакліканы працаваць у сферы аховы здароўя. Ён нагадаў аб важнасці сакрамэнтаў, якія прымаюць у сваім жыцці хворыя. “Сакраменты спрыяюць канкрэтнаму і эфектыўнаму ўнутранаму аздараўленню, з’яўляюцца адзіным лекам, які дае надзею”, – адзначыў кіраўнік ватыканскай дыкастэрыі. Ён звярнуў увагу на тое, што хрысціянская надзея і самаадданасць у дапамозе дзецям, хворым, пажылым, інвалідам – становіцца аднаўленчай сілай грамадства і робіць хворых першымі будаўнікамі сапраўднай супольнасці. На заканчэнне сваіх разважанняў арцыбіскуп Зімоўскі адзначыў, што жыць разам з хворымі – гэта сапраўдная школа жыцця.

Юрась Сцяпанаў паводле www.vatican.by

Конкурс перакладаў Канвенцыі ААН аб правах інвалідаў

Glauredactar — Sat, 11 Feb 2012 03:19:26 +0000

Асветніцкая праваабарончая ўстанова “Офіс па правах людзей з інваліднасцю” абвясціла конкурс на лепшы на беларускамоўны пераклад Канвенцыі аб правах інвалідаў.

Каб узяць удзел у гэтым творчым спаборніцтве, трэба даслаць конкурсную працу ды карэктна запоўненую анкету ўдзельніка (бланк апошняй знаходзіцца на старонцы www.disright.org/files/file_name459.anketa_bel.doc). Пераклады прымаюцца да 1 сакавіка на адрас: info@disright.org. Арганізатары просяць, каб конкурсныя лісты мелі пазнаку “Пераклад”.

Офіс па правах людзей з інваліднасцю абяцае, што вынікі творчага спаборніцтва будуць падведзены цягам двух тыдняў.

Юрась Сцяпанаў

“Лідэрства без абмежаванняў” для неабыякавай беларускай моладзі

Glauredactar — Tue, 07 Feb 2012 08:21:08 +0000

Беларускае прадстаўніцтва Міжнароднага дзіцячага фонду запрашае маладых людзей ладзіць курс “Лідэрства без абмежаванняў” для навучання і дапамогі ўдзельнікам (маладым людзям з інваліднасцю). Да ўдзелу ў занятках запрашаюцца маладыя людзі (15 – 17 гадоў) з інваліднасцю, якія хочуць змяніць сваё жыццё да лепшага і быць актыўнымі лідэрамі для свайго атачэння. Да ўдзелу ў курсе таксама будуць запрошаныя валанцёры з ліку студэнтаў педагагічных ВНУ, што будзе садзейнічаць пашырэнню вопыту зносін удзельнікаў з інваліднасцю з людзьмі без фізічных абмежаванняў і з моладдзю старэйшага ўзросту.

Курс “Лідэрства без абмежаванняў” закліканы дапамагчы ўдзельнікам раскрыць свае неабмежаваныя магчымасці і рэалізаваць лідэрскі патэнцыял ва ўласным жыцці праз узмацненне асабістай эфектыўнасці, умацаванне ўзаемасувязяў з сям’ёй і супольнасцю, навучанне навыкам мэтапакладання, планавання, камунікацыі і супрацоўніцтва. Пасля заканчэння навучання ўдзельнікі атрымаюць магчымасць рэалізаваць уласныя ідэі (міні-праекты) у сваіх супольнасцях.

Адбор асоб, зацікаўленых ва ўдзеле ў якасці валанцёраў, ажыццяўляецца на конкурснай аснове на ўсё навучанне, якое складаецца з чатырох трохдзённых сесій:

1) 24 – 26 лютага 2012 года – «Разуменне сябе. Развіццё асабістай эфектыўнасці»;

2) 16 – 18 сакавіка 2012 года – «Разуменне іншых. Майстэрства зносін»;

3) 13 – 15 красавіка 2012 года – “Жыццё ў супольнасці. Як знайсці сваё месца ў грамадстве і дамагчыся пазітыўных змен у сваім жыцці”;

4) 27 – 29 красавіка 2011 года – “Лідэрства ў супольнасці. Як вырашаць свае і “чужыя” праблемы і дамагчыся пазітыўных зменаў у грамадстве”.

Зацікаўленым асобам варта запоўніць спецыяльную анкету. Яе бланк можна скапіяваць на старонцы: www.cfi-belarus.org/rus/about/news/4f184269baecb/. Анкету неабходна выслаць на адрас: nshrub@belarus.childfund.org або па факсавых нумарах: +375 17 257 77 08 ды +375 17 257 77 09 да 10 лютага 2012 года.

Міжнародны дзіцячы фонд бярэ на сябе выдаткі, звязаныя з пражываннем і харчаваннем валанцёраў, а таксама кампенсуе ім транспартныя расходы па прад’яўленні арыгінала праязных дакументаў.

Юрась Сцяпанаў

Французскія палітыкі ў якасці сляпых

Glauredactar — Fri, 20 Jan 2012 09:21:00 +0000

Французскі Фонд невідушчых апублікаваў каляндар, на якім вядомыя палітычныя персоны выступаюць у якасці сляпых.

На старонках выдання можна пабачыць прэзідэнта Нікаля Сарказі ў чорных акулярах і з белай палкай, а таксама яго палітычнага ворага нумар адзін, былога прэм’ера Дамініка дэ Вільпена.

Падобным чынам, дзякуючы фотамантажу, паказаныя героі многіх сексуальных скандалаў, напрыклад, былы старшыня МВФ Дамінік Строс-Кан і кандыдатка партыі зялёных на прэзідэнцкіх выбарах Ева Джолі.

Кампанія павінна прыцягнуць увагу грамадскай думкі і палітыкаў да праблем сляпых людзей. Разам з календаром распаўсюджваецца заклік да палітыкаў, каб яны зрабілі ўсё дзеля вяртання сабе даверу невідушчых асобаў, у дачыненні да якіх не рэалізаваныя абяцанні.

У Францыі жыве 80 тысяч сляпых і 300 тысяч слабавідушчых. Ім неабходныя годныя ўмовы жыцця, напрыклад, доступ да газет і кніг. Толькі 3% публікацый прыстасаваныя да патрэбаў слабавідушчых людзей.

Юрась Сцяпанаў паводле www.radyjo.net

Міжнародны орган заклікае працягваць барацьбу са СНІДам

Glauredactar — Thu, 01 Dec 2011 18:29:47 +0000

Першага снежня адзначаецца Сусветны дзень барацьбы са СНІДам. Апошняя статыстыка Арганізацыі Аб’яднаных Нацый паказвае, што летась каля 1 мільёна 800 тысяч чалавек па ўсім свеце памерла ад захворванняў, звязаных са СНІДам.

Згаданая лічба прыкладна на 100 тысяч чалавек менш у параўнанні з 2009 годам. Гэта адбылося дзякуючы ранняй дыягностыцы і належнай тэрапіі.

Аднак да 14 мільёнаў чалавек ва ўсім свеце маюць патрэбу ў лячэнні.

Дырэктар Сусветнага фонду па барацьбе са СНІДам заклікае да працягу міжнароднай дапамогі для барацьбы з гэтым захворваннем, нягледзячы на засцярогі з нагоды недахопу сродкаў ва ўмовах сусветнага эканамічнага крызісу.

Юрась Сцяпанаў паводле www.nhk.or.jp

Веласіпедысты з парушэннямі зроку едуць вакол Тайваня

Glauredactar — Sun, 27 Nov 2011 20:42:43 +0000

Група з 10 веласіпедыстаў з парушэннямі зроку, кожны ў суправаджэнні відушчага трэнера, адправілася 19 лістапада ў адзінаццацідзённую вандроўку вакол вострава Тайвань.

Веласіпедысты, якія завуць сябе “Рыцары ў цемры”, адправіліся ў шлях з плошчы ў Мемарыяла Чан Кай-шы ў Тайбэі, сталіцы краіны. Падарожжа праходзіць на падвойных роварах.

Арганізатар заезду – 48-гадовы невідушчы спартсмен і старшыня тайваньскай асацыяцыі духоўнага развіцця Дэвід Чжан. Паводле яго слоў, мэта заезду – паказаць іншым прыклад пераадолення ўласных фізічных недахопаў і пашырэння межаў сваіх магчымасцяў.

Да гэтага Чжану ўжо даводзілася здзяйсняць заезды або забегі вакол Тайваня.

Для ўсіх іншых невідушчых спарстменаў гэта стане першай вандроўкай. Заезду папярэднічалі два месяцы трэніровак і ўсталяванне даверлівых адносін з трэнерам.

Групу невідушчых веласіпедыстаў суправаджае каманда з 48 чалавек, у тым ліку брыгада журналістаў, якія паведамляюць аб ходзе заезду ў сацыяльных сетках і відэаблогах. Грамадскасць заклікалі падтрымліваць веласіпедыстаў.

Першым прыпынкам веласіпедыстаў стаў горад Сіньчжу, пасля якога яны адправіліся ў Тайчжун. Пераадолеўшы 1050 кіламетраў, яны вернуцца ў Тайбэй 29 лістапада.

Юрась Сцяпанаў паводле russian.rti.org.tw

У Горадні зладжана акцыя на карысць хворых дзяцей і дзяцей-інвалідаў

Glauredactar — Sun, 27 Nov 2011 19:57:59 +0000

У горадзе над Нёманам распачалася дабрачынная акцыя “Калядная паштоўка на карысць хворых дзяцей”. Ініцыятарам выступіла мясцовая грэка-каталіцкая парафія Маці Божае Фацімскае ды валанцёры хрысціянскага Руху cвятога Мікалая. Сэнс акцыі ў тым, што ахвярадаўцы на карысць хворых малых ды дзяцей-інвалідаў атрымаюць на памяць арыгінальныя калядныя паштоўкі.

Больш пра дабрачыннае мерапрыемства можна пачуць па-беларуску на старонцы www.radyjo.net/4/92/Artykul/59229,Каляды-дапамога-дзецям у перадачы Польскага радыё для замежжа.

Юрась Сцяпанаў паводле www.radyjo.net

Японскія кампаніі не спяшаюцца браць на працу інвалідаў

Glauredactar — Sun, 27 Nov 2011 06:51:30 +0000

Як вынікае з даследавання, праведзенага Міністэрствам працы Японіі, менш за палову апытаных прыватных японскіх кампаній адпавядаюць устаноўленым заканадаўствам нормам па працаўладкаванні людзей з фізічнымі недахопамі.

Паводле існуючага закону, доля інвалідаў у штаце прыватных фірм з колькасцю рабочай сілы больш за 56 чалавек павінна складаць 1,8 працэнта.

Юрась Сцяпанаў паводле www.nhk.or.jp

Юныя тайваньцы вынайшлі кубак для людзей з праблемамі зроку

Glauredactar — Mon, 31 Oct 2011 23:45:51 +0000

Як паведаміла Міжнароднае радыё Тайваня, з 27 па 30 кастрычніка ў Нюрнбергу (Нямеччына) праходзіла выстава вынаходак “iENA Nuremberg”. У ёй прынялі ўдзел 750 вынаходнікаў з 30 краін свету. Тайваньская дэлегацыя, якая складалася са студэнтаў, прадстаўнікоў даследчых інстытутаў і прыватных фірмаў, выйграла 26 залатых, 45 сярэбраных і 11 бронзавых медалёў і адну спецыяльную ўзнагароду.

Самымі маладымі ўзнагароджанымі тайваньцамі сталі двое вучняў прыватнай сярэдняй школы ў горадзе Цзілун. Яны атрымалі залаты медаль. 13-гадовы Гао Сюань-цзе (на здымку ў цэнтры) і яго 14-гадовы стрыечны брат Чэнь Цзі-жэнь (на здымку першы справа) вынайшлі кубак для людзей са слабым зрокам. Калі вадкасць дасягае крытычнага ўзроўню, посуд падае папераджальны сігнал.

Адзін з школьнікаў распавёў, што на стварэнне такога кубку яго натхніў дзядзька са слабым зрокам, які ўвесь час абпальваўся, калі спрабаваў наліць гарачай вады ў шклянку.

Юрась Сцяпанаў

Дапамога інвалідам ад “Чалавечага капіталу”

Glauredactar — Sat, 22 Oct 2011 13:20:40 +0000

Інвалід у Польшчы можа атрымаць на заснаванне бізнесу 40 тыс. злотых (каля 10 тыс. еўра). Гэтыя сродкі выдаюцца з фондаў Еўрапейскага Саюза ў межах праграмы “Чалавечы капітал”.
Акрамя фінансавай падтрымкі, для людзей з абмежаванымі магчымасцямі праводзяцца бясплатныя курсы па бухгалтэрыі, асновах вядзення гаспадарчай дзейнасці, падаткаабкладанні ды стварэнні бізнес-планаў.

Юрый Сцяпанаў паводле www.radyjo.net